Творча падышлі ўдзельнікі інавацыйнага праекта ў гэтым навучальным годзе да ўдзелу ў конкурсе “ART-гаспадынька”.

Як заўсёды, рыхтавацца да ўдзелу ў конкурсе пачалі загадзя: праводзілі міні-даследаванні, выбіраючы беларускую нацыянальную страву, якую можна прыгатаваць, каб здзівіць членаў журы і іншых удзельнікаў конкурсу. Трэба адзначыць, што з кожным годам становіцца і складаней, і цікавей, бо знайсці рэцэпт стравы, якую ніхто яшчэ не прадстаўляў на наш конкурс няпроста. Тым не менш удзельнікі паспяхова дэманструюць не толькі свае кулінарныя здольнасці, але і цудоўнае веданне асаблівасцей беларускай нацыянальнай кухні. Адначасова яшчэ і слоўнікавы запас узбагачаецца, бо не так проста агучыць відэа па-беларуску. Стараюцца ўдзельнікі конкурсу яшчэ і дэкарацыі ў беларускім нацыянальным стылі аформіць. Журы ўлічвае ўсе гэтыя акалічнасці (згодна з умовамі конкурсу).

Вельмі прыемна, што ў гэтым навучальным годзе зноў да ўдзелу далучыліся і хлопчыкі, якія і сталі пераможцамі.

Журы адзначыла дыпломамі відэаролікі каманд 7 ”В”, 6 ”Б”, 8 “Б”, 8 “В” класаў. Дыплом І ступені і статуэтку “ART-гаспадынька-2021” атрымалі вучні 7 “Б” класа за арыгінальную дэманстрацыю беларускай нацыянальнай стравы “Грыбная поліўка”. Пазнаёміцца з работамі ўдзельнікаў і пераможцаў можна па спасылцы: https://drive.google.com/drive/folders/1Hfjm45rQ-FIOBfIgtBXoaljA0DGJc24M?usp=sharing

Рыхтуемся да конкурсу ў 2021/2022 навучальным годзе.

Поспехаў усім і смачна есці!

Квест “У пошуках скарбаў” прымусіў вучняў 7 класаў зразумець, што скарбы роднай мовы адшукаць не так і проста. Хлопцам і дзяўчатам было цікава не толькі разгадваць рэбусы, каб атрымаць код і продоўжыць падарожжа, але і самім скласці крыжаванку, успомніць, якія персанажы дзейнічаюць у той ці іншай кнізе, каб адшукаць чарговую падказку.

Квеставая прастора была абмежавана тэрыторыяй аднаго кабінета, што стварала асаблівую інтрыгу: дзе можна схаваць аж восем падказак у адным кабінеце. Азарт, пошук, супрацоўніцтва, трывалыя веды дапамаглі сямікласнікам справіцца з заданнямі і паспяхова дасягнуць мэты вандроўкі – знайсці “ўсе скарбы роднай мовы”. Але галоўнай каштоўнасцю сталі новыя веды, набытыя падчас гульні, якія сталі чарговай прыступкай да пазнання беларускай мовы і культуры.

Сапраўдным святам у нашай школе стаў традыцыйны конкурс “Спяваем па-беларуску”, які ператварыўся з невялікага канцэрта некалькі гадоў таму ў значны праект пошуку і творчасці. Вучні, бацькі і настаўнікі рыхтуюцца да конкурсу на працягу ўсяго года. Шукаюць прыгожыя беларускія песні, каб здзівіць слухачоў і членаў журы арыгінальнасцю, вывучаюць гісторыю яе стварэння. А потым ідзе актыўная падрыхтоўка да выступлення: прадумваюцца дэкарацыі і касцюмы, развучваюцца песні. А колькі часу ідзе на рэпетыцыі, абмеркаванні!

У гэтым навучальным годзе свята не стала грандыёзным канцэртам як у мінулыя гады, бо прыйшлося праводзіць у фармаце відэазапісаў. Але ўрачыстасці і святочнасці мерапрыемства не страціла: зноў аб’ядналіся вучні, бацькі і настаўнікі, каб зрабіць яшчэ і запісы сваіх выступленняў на відэа. Гэта крыху ўскладніла задачу, але ж мы можам затое глядзець і слухаць беларускія песні ў выкананні нашых вучняў у любы час. Відэазапісы выступленняў пераможцаў можна паглядзець па спасылцы тут: https://drive.google.com/drive/folders/1Y3hfjvLmogcktXttMtPNmlMibeiRt7Cb?usp=sharing

Пераможцамі конкурсу ў 2020/2021 навучальным годзе сталі:

Паліна Падабед-Цагалка (3 “В” клас) – Дыплом І ступені і статуэтка “Скрыпічны васілёк” за цудоўнае выкананне песні “Спіць мядзведзь”

Уладзіслава Колтун (4 “В” клас) – Дыплом І ступені і статуэтка “Скрыпічны васілёк” за выкананне песні “Няма другой такой”.

Дыплом ІІ ступені журы прысудзіла: Кацярыне Завадскай (5 “Б” клас), якая цудоўна выканала песню “Явар і каліна” і вучаніцы 3 “Б” класа Ганне Гуцікавай і яе сябру Івану Бераставу за арыгінальнае выкананне песні “Хлопец пашаньку пахае”.

Дыплом ІІІ ступені атрымалі: Павел Падабед-Цагалка (7 “В” клас) за выкананне песні “Небасхіл Еўропы”, Нур Ібрагім і Арцём Гарэўскі (6 “Б” клас) за выкананне песні “Ніколі”, вакальная група 10 класа (Карына Лесіна, Аліна Буда, Мацвей Мяргур’еў, Мацвей Ракіцкі) за выкананне беларускай народнай песні “Саўка ды Грышка”.

Ганна Аніскавец (3 “В” клас) атрымала Дыплом пераможцы ў намінацыі “Лепшае сцэнічнае ўвасабленне” за выкананне беларускай народнай песні “Жавароначкі”, Глеб Фурманаў і Паліна Піпчанка Дыплом пераможцы ў намінацыі “Лепшы аўтарскі праект”.

Вакальная група “Мара” (кіраўнік Вера Дзмітрыеўна Раманцава), якая выканала песню “Беларусь – ты наш родны кут”, атрымала Дыплом за перамогу ў намінацыі “Лепшая вакальная група”.

Віншуем пераможцаў і пачынаем падрыхтоўка да чарговага конкурсу “Спяваем па-беларуску” ў новым навучальным годзе.

Міжнародны дзень роднай мовы ўжо традыцыйна пачаўся ў нашай школе з флэш-мобу “Скажыце па-беларуску”. Толькі на гэты раз мы прапанавалі не перакласці словы з рускай мовы на беларускую, а назваць адразу па-беларуску тое, што было адлюстравана на выявах. Большасць вучняў з заданнем лёгка справілася, а таксама ўсе настаўнікі без цяжкасці называлі беларускія словы.  Святочнага настрою надалі і беларускія песні, якія гучалі ў фае школы. 

А вось другая частка свята аказалася не такой лёгкай для выканання. Каб адказаць на пытанне, адкуль пайшла традыцыя адзначаць Міжнародны дзень роднай мовы, а таксама на шэраг іншых пытанняў вучні 5 – 9 класаў павінны былі прайсці чатыры станцыі QR-квеста “Свята роднай мовы”. На ўсіх перапынках было чым заняцца: знайсці QR-код, выканаць заданні з яго дапамогай, выбраць неабходную інфармацыю, запомніць, каб потым яе выкарыстаць. Найхутчэй з заданнямі справіліся вучні 8”В” класа, не адсталі і 7 “В” і 7 “Б” класы.

Для вучняў пачатковай школы была прапанавана інтэрактыўная гульня “Збяры валізку”, якую прыдумалі для іх і правялі ўдзельнікі літаратурна-творчага аб’яднання “Купалінка”. Вучні пачатковых класаў ужо ведаюць сяброў аб’яднання і заўсёды чакаюць, бо гульні, якія яны прапануюць, вельмі цікавыя. На гэты раз пачаткоўцы адправіліся ў касмічнае падарожжа, а вось што і каго яны з сабой узялі, ведаюць толькі тыя, хто разумее беларускую мову.

Дзень прайшоў займальна і плённа.

Конкурс прэзентацый “Беларускія традыцыі” па-сапраўднаму зацікавіў вучняў 6-х і 7-х класаў. Вялася грунтоная падрыхтоўчая праца на працягу некалькіх тыдняў, вучні разам з настаўнікамі і бацькамі шукалі цікавы матэрыял пра беларускія народныя традыцыі, выбіралі галоўнае, кампанавалі матэрыял, падбіралі ілюстрацыі, фотаздымкі, стваралі прэзентацыі. Нямала часу было патрачана і на рэпетыцыі, бо прэзентацыю трэба было яшчэ і годна прадставіць. 

Асабліва цікава было слухаць пра тыя традыцыі беларусаў, якія ўжо амаль забыты: талака, вяселле. Але знайшлі вучні і ў вядомых беларускіх святах цікавыя абрады і традыцыі, каб здзівіць сваіх аднакласнікаў.

Пераможцамі конкурсу былі прызнаны Сафія Андрэева, вучаніца 7 “Б” класа (прэзентацыя “Беларускае Купалле”) – Дыплом І ступені. Марк Чашун, вучань 7 “Б” класа (прэзентацыі “Талака – старадаўні звычай беларусаў” і “Жаніцьба Цярэшкі”) – Дыплом ІІ ступені. Калектыўны праект вучняў 6 “Б” класа “Беларускае вяселле” – Дыплом ІІІ ступені.

Віншуем пераможцаў і жадаем новых поспехаў у сяброўстве з беларускай культурай!

Пераднавагоднія клопаты заўсёды вельмі прыемныя і радасныя. Традыцыйна мы стараемся ўпрыгожыць наша жыллё: ставім ёлку, развешваем гірлянды. А вось нашы продкі таксама рыхтаваліся да свята. І каб наблізіць вучняў да беларускіх традыцый мы вырашылі правесці майстар-класы па ўпрыгожванні школьных вокнаў выцінанкамі ў нацыянальным стылі, якія правялі класныя кіраўнікі са сваімі выхаванцамі. Вольга Пятроўна Лапіна разам з вучнямі распрацавала шаблоны, якія змаглі выкарыстаць усе класы. Прыемна, што наша ўстанова адукацыі ўжо некалькі гадоў запар выглядае падчас навагодніх і калядных святаў стыльна, па-беларускуі вельмі ўрачыста.

 разгарнуць » / « згарнуць

Любімы конкурс вучняў 5 – 8 класаў нашай школы “ART-гаспадынька” ў гэтым навучальным годзе прайшоў, на жаль, у скарочаным фармаце. Журы былі прадстаўлены 12 відэаролікаў “Смачна есці”, у якіх канкурсанты прапанавалі свае   варыянты прыгатавання нацыянальных беларускіх страў. Атрымалася весела, пазнавальна, прыгожа. Каб стварыць кароценькі сюжэт усяго да адной хвіліны, удзельнікам конкурсу неабходна было правесці сур’ёзную даследчую і творчую работу: знайсці рэцэпт традыцыйнай беларускай стравы, магчыма, цікавую інфармацыю пра яе, напісаць сцэнарый, правесці рэпетыцыі, закупіць прадукты, пад наглядам бацькоў прыгатаваць страву, пры гэтым зняць працэс прыгатавання на відэа, зманціраваць ролік да трох хвілін, падабраць і накласці музыку, дапоўніць эфектамі… І аддаць на суд строгаму і справядліваму журы.

Пераможцамі конкурсу сталі каманда 6 “В” класа, якія прыгатавалі беларускую бабку. Яны і атрымалі Дыплом І ступені. Дыплом ІІ ступені за відэаролік “Беларускія клёцкі” ўручаны камандзе 6 “А” класа. Дыплом ІІІ ступені – гаспадынькам 5 “Б” класа за арыгінальную страву рабчыкі і 6 “Б” за відэаролік, у якім расказвалася, як прыгатаваць кулагу з аладкамі.

Сярод вучняў 7 – 8 класаў пераможцамі сталі гаспадынькі 7 “В” класа (Дыплом І ступені) за відэа “Чакаем бабулю – гатуем бабку”, знятае з дасціпным гумарам, каманда 7 “Б” класа (Дыплом ІІ ступені) за цудоўную прэзентацыю беларускага напою збіцень. Дыплом ІІІ ступені прысуджаны камандзе гаспадынь 8 “В” класа за відэаролік “Запечаныя яблыкі”.

Поспехаў усім удзельнікам конкурсу ў сяброўстве з беларускай культурай. Смачна есці!

Відэаролікі, створаныя пераможцамі,  мы размясцілі ТУТ:

5-6 класы

У суботу ў нашай школе адбыліся святочныя вячоркі, прымеркаваныя да свята Масленіцы. Незвычайны фармат спадабаўся гасцям мерапрыемства, якое ладзілася ў межах інавацыйнага праекта. Чатыры творчыя блокі свята далі магчымасць праявіць свае таленты нашым юным спевакам, музыкам, паэтам і дызайнерам. Упрыгажэннем праграмы стала моднае дэфіле “Васільковая фантазія”. Сапраўды, крэатыўныя ідэі строяў не мелі межаў! З дапамогай бацькоў былі створаны незвычайныя і вельмі прыгожыя вобразы.

Удзельнікі гуртка “Купалінка” падарылі гледачам свае вершы, музыкі дадалі святочнасці, іграючы на розных інструментах, спевакі гукалі вясну песнямі.

З цудоўным вясновым настроем вучні, настаўнікі і бацькі пакідалі залу.

ФОТА

Міжнародны дзень роднай мовы ў нашай школе пачаўся з традыцыйнага флэш-мобу “Нашы любімыя словы”. Кожнага, хто заходзіў у школу, сустракалі вучні 9 “Б” класа і прапаноўвалі назваць беларускімі словамі фотавыявы. Прыгожыя беларускія словы можна было таксама напісаць на імправізаваным плакаце. Усе, хто правільна называў беларускія словы, атрымалі ў падарунак эмблему з выявай васілька – сімвала свята роднай мовы ў нашай школе.

На працягу дня шасцікласнікі завіталі да вучняў 3 – 4 класаў з цікавай гульнёй “Залацінкі беларускай мовы”.

QR-квест “Свята роднай мовы” таксама прайшоў весела і пазнавальна. Удзельнікі гульні даведаліся, з якой нагоды і калі быў абвешчаны Міжнародны дзень роднай мовы, якія помнікі мовам існуюць у свеце, якім літарам пастаўлены скульптуры. Вучні змаглі адначасова ўдасканаліць свае навыкі карыстання інтэрнэт-рэсурсамі і пераканацца, што беларуская мова шырока прадстаўлена ў інтэрнэт-прасторы.

У межах свята роднай мовы быў праведзены таксама конкурс “Спяваем па-беларуску” 15 лютага.

Гучала беларуская мова, спеўная, меладычная, прыгожая, “святочная,з росных травак-былінак сабраная, медунічная і палынная”. Прымалі ўдзел у конкурсе вучні І – ХІ класаў, бацькі і настаўнікі. Гучалі песні аб роднай Беларусі, пра каханне, філасофскія і лірычныя, сумныя і жартоўныя, народныя і сучасныя, спявалі пад акампанемент і акапэльна.

Журы вызначыла пераможцаў у розных намінацыях.

Дыпломы І ступені і сімвал конкурсу “Скрыпічны васілёк” атрымалі вучаніцы 1 “В” класа Ганна Анісавец і Марыя Цыбіна за цудоўнае выкананне песні “Лявоніха” (сярод вучняў І – ІVкласаў) і вакальная група 7 “Б” класа з класным кіраўніком Надзеяй Васільеўнай Ярмолік і настаўнікам фізікі і інфарматыкі Мікалаем Леанідавічам Ганько за арыгінальнае выкананне песні “Полька беларуская”.

Дыпломы ІІ ступені журы прысудзіла Мілане Загорскай (2 “Б” клас, песня “Дзяўчынка-беларуска”), Крысціне Ганчаровай і маме Марыне Казіміраўне Ганчаровай (6 “Б” клас, народная песня “Коцік”) і дуэту Сафія Цвердахлебава & Павел Падабед-Цэгалка (6 “В” клас, песня “Завіруха”).

Дыпломы ІІІ ступені дасталіся Аляксандры Зяньковіч (2“Б” клас, песня “Гэта Беларусь мая”) і Святлане Сяргеенка (5“В” клас, песня “Па-над белым пухам вішняў”).

Дыплом пераможцы ў намінацыі “Сучасная беларуская песня” атрымала Марыя Мельнік (2 “Г” клас, песня “Ветлівыя словы”), у намінацыі “Беларуская народная песня” – вакальная група 8-х класаў (песня “Чарнявая, бялявая…”). Лепшай вакальнай групай журы прызнала калектыў 9 Б” класа (песня “Саўка ды Грышка”). Журы таксама адзначыла дыпломамі арыгінальнае выкананне песні “Родны бусел” вучнямі 2 “В” класа. Прыз сімпатый гледачоў дастаўся вучням 7 “В” класа (песня “Маладая Беларусь”), а перамога ў намінацыі “Творчы пошук” Глебу Фурманаву і Лізавеце Касцічка (10 клас).

Пераможцам сярод бацькоў стала Алена Мікалаеўна Шумак, якая выканала песню “Беларусы мы”. У намінацыі “Педагагічны дэбют” узнагароду атрымалі Тамара Аляксееўна Манцівода, Ганна Аляксандраўна Камарова, Вольга Васільеўна Лагун.

Гэта было феерычнае свята. Да сустрэчы ў наступным годзе на нашым традыцыйным конкурсе “Спяваем па-беларуску”.

Настаўнікі, вучні і выпускнікі Ждановіцкай сярэдняй школы далучыліся да абласной акцыі “29 добрых спраў”. Яркім мерапрыемствам стала прэзентацыя кнігі-квэста “Ключ ад Вялікай Каштоўнасці” на Мінскай міжнароднай кніжнай выставе-кірмашы, якая праходзіла ў павільёне Белэкспа з 5 па 9 лютага 2020 года.

Творчая каманда Ждановіцкай сярэдняй школы правяла дзве прэзентацыі на кніжнай выставе. 7 лютага тэатралізаваная пастаноўка была прадстаўлена на Дзіцячай пляцоўцы для юных чытачоў, а 9 лютага мы выступалі для шырокай публікі на Нацыянальным стэндзе Рэспублікі Беларусь.

Пра наша выступленне на хвалях радыё “Культура” раскажа карэспандэнт, які пасля прэзентацыі браў інтэрв’ю ў у удзельнікаў.

Клуб юнага журналіста “ЛІМОН”

Квест-майстар-клас “Гуканне вясны” весела і творча прайшоў для вучняў 5-х і 6-х класаў.  Тры каманды атрымалі маршрутныя лісты і накіраваліся па сваіх станцыях ў пошуках інфармацыі.

З дапамогай QR-кода адшукалі звесткі пра незвычайнае свята нашых продкаў, якое ў ХХІ стагоддзі практычна не захавалася. Вучні адказалі на пытанні, змешчаныя ў маршрутным лісце і атрымалі дазвол рухацца далей.

Каб паглядзець відэафільм “Гуканне вясны”, удзельнікі квеста павінны былі прыняць удзел у майстар-класе па вырабе птушак. Прыйшлося прачытаць схему, праявіць кемлівасць, працаваць у камандзе. Прагляд відэафільма дазволіў перанесціся ў незвычайны свет традыцый нашых продкаў, адчуць паэтыку народнага свята, яго прыгажосць.

Апошні прыпынак быў самы вясёлы: выканаўшы заданні, вучні атрымалі магчымасць праспяваць вяснянкі пад караоке.

Многія ўдзельнікі квеста прызналіся, што ўпершыню далучыліся да гэтай старажытнай традыцыі нашых продкаў, і адзначылі, што было гэта весела, пазнавальна, карысна.

Тэматычны рэспубліканскі семінар “Кластарная мадэль кіравання як сродак павышэння эфектыўнасці і прадуктыўнасці інавацыі” прайшоў 4 снежня 2019 года на базе дзяржаўнай установы адукацыі “Ждановіцкая сярэдняя школа” з мэтай фарміравання ўпраўленчай кампетэнтнасці кіраўнікоў устаноў адукацыі па ўкараненні кластарнай мадэлі кіравання інавацыяй у межах сеткавага ўзаемадзеяння, арганізаваны Таццянай Фадзееўнай Пашковіч, намеснікам начальніка цэнтра развіццёвых педагагічных тэхналогій ДУА “Акадэмія паслядыпломнай адукацыі”. Удзельнікамі семінара сталі кіраўнікі ўстаноў адукацыі, якія працуюць над рэалізацыяй інавацыйнага праекта “Укараненне этнакультурных тэхналогій для пашырэння і ўзбагачэння адукацыйнага асяроддзя ўстановы адукацыі”.

Удзельнікаў семінара сустрэла танцавальная студыя “Трыумф”, якая працуе пад кіраўніцтвам педагога дадатковай адукацыі Левічавай Таццяны Алегаўны.

Стрэчка Анатолій Паўлавіч, дырэктар школы, прывітаў гасцей і выступіў з прэзентацыяй дзейнасці ўстановы адукацыі “Ждановіцкая сярэдняя школа”, а таксама прэзентаваў завочную экскурсію па аграгарадку Ждановічы, створаную вучаніцай 9 класа Вікторыяй Дарожка.

Прэзентацыю вопыту першага года рэалізацыі інавацыйнага праекта прадставілі каардынатар інавацыйнага праекта, намеснік дырэктара па вучэбнай рабоце Кацярына Аляксандраўна Ждановіч і настаўнік беларускай мовы і літаратуры Рэгіна Генадзьеўна Чашун.

Майстар-класы для ўдзельнікаў семінара правялі педагог-псіхолаг Вольга Вікенцьеўна Акуліч “Пераадоленне псіхалагічных бар’ераў у інавацыйнай дзейнасці педагогаў” і настаўнік беларускай мовы і літаратуры Рэгіна Генадзьеўна Чашун “Вершаскладанне як сродак папулярызацыі беларускай мовы”.

Удзельнікі інавацыйнага праекта Даніліна Марына Віктараўна, Жук Вольга Алегаўна, Камарова Ганна Аляксандраўна, Крукоўская Алена Валяр’янаўна, Манцівода Тамара Аляксееўна, Несцяронак Ірына Аляксандраўна прапанавалі кіраўнікам устаноў адукацыі прыняць удзел у QR-квесце “Калядная зорка”.

Падчас абмеркавання выступілі кіраўнікі ўстаноў адукыацыі: Чычкан Яўгеній Мікалаевіч (дзяржаўная ўстанова адукацыі “Жухавіцкая сярэдняя школа”Карэліцкі раён), Паплёўка Уладзімір Антонавіч (дзяржаўная ўстанова адукацыі “Гасцілавіцкая сярэдняя школа” Лагойскага раёна), Дравіца Рэгіна Іванаўна (дзяржаўная ўстанова адукацыі “Азёркаўская сярэдняя школа”), Блашко Марыя Юльянаўна (дзяржаўная ўстанова дадатковай адукацыі “Радунскі раённы цэнтр турызму, краязнаўства і экалогіі” Воранаўскі раён).

Вынікі семінара падвяла куратар праекта, намеснік начальніка цэнтра развіццёвых педагагічных тэхналогій ДУА “Акадэмія паслядыпломнай адукацыі” Таццяна Фадзееўна Пашковіч, якая прапанавала рэалізаваць кластарную мадэль кіравання як сродак павышэння эфектыўнасці і прадуктыўнасці інавацыі ў межах сеткавага ўзаемадзеяння ўдзельнікаў праекта “Укараненне этнакультурных тэхналогій для пашырэння і ўзбагачэння адукацыйнага асяроддзя ўстановы адукацыі”.

ФОТА ГАЛЕРЭЯ

Дзень работніка метадычнай службы ў межах ІХ педагагічнага марафона “Выхаванне сямейных каштоўнасцей: партнёрства сям’і, школы і грамадства” 10 кастрычніка 2019 года запрасіў творчых педагогаў Мінскага раёна на метадычны практыкум “Праект як сродак узаемадзеяння сям’і і школы” ў дзяржаўную ўстанову адукацыі “Ждановіцкая сярэдняя школа”. Гасцей сустрэла танцавальная група “Трыумф” з кампазіцыяй “Беларусь мая”.

Беларускі паэт, намеснік рэдактара часопіса “Нёман”, лаўрэат прэміі “Залаты купідон” Уладзімір Мазго 5 сакавіка адзначыў 60-гадовы юбілей. А 6 сакавіка юбіляр завітаў на сустрэчу з пяцікласнікамі, якая адбылася ў памяшканні Ждановіцкай сельскай бібліятэкі. Аўтар паэтычных кніг «Пад спеў крыніц», «Вершаліна», «Марафон», «Анёл нябесны», «Калі спрачаюцца маланкі», «Суседзі па сусвеце», «Смехапад», «Прыгоды марахода», «Цуда-вуда», «Таямнічая планета» расказаў, што дапамагае ў жыцці і творчасці. Кожнаму хацелася задаць пытанне вядомаму беларускаму паэту, на якія той ахвотна адказваў. Вучні і супрацоўнікі бібліятэкі павіншавалі Уладзіміра Мінавіча з юбілеем і пажадалі творчых поспехаў і плёну. А пасля кожны мог набыць кнігу “Адвечныя скарбы Радзімы” і атрымаць аўтограф.

Міжнародны дзень роднай мовы 21 лютага ў нашай школе пачаўся з усмешак і цудоўнага настрою. Флэш-моб “Скажы па-беларуску” ладзілі вучні 5-х і 8-х класаў. Усім, хто заходзіў у школу, былі прапанаваны малюнкі, якія трэба было назваць беларускімі словамі (агрэст, бэз, арэлі, альтанка, кубак, сподак…). Кожны таксама мог атрымаць і прымацаваць сабе выяву васілька – традыцыйны сімвал дня роднай мовы ў нашай школе. Усе запісвалі свае любімы беларускія словы на пялёстках рамонка.

Вучні 9-х і 10 класаў правялі конкурс “Загадкі-жарты з фразеалагізмамі”. Акцыю “Веру – не веру” прапанавалі вучні 11 класа. “У беларускай мове 43 гукі – верыш ці не?” Такія пытанні многіх прымусілі задумацца, аднак атрымалася таксама весела і цікава. Вучні 7-х класаў падрыхтавалі прэзентацыю “Міжнародны дзень роднай мовы: гісторыя і сучаснасць”. А 12 гадзіне пачаўся рэспубліканскі конкурс-гульня “Буслік-2019”. Кіраўнік ўстановы адукацыі А.П.Стрэчка пажадаў удзельнікам лёгкіх заданняў і поспехаў у конкурсе. Падчас урачыстай цырымоніі гучалі вершы Максіма Танка і Пімена Панчанкі ў выкананні вучняў 8 “Б” класа Міхаіла Загінайлы і Вікторыі Міцкевіч. А таксама ўдзельнікі конкурсу паслухалі сучасную беларускую песню ў выкананні вучаніцы 7 “В” класа Златы Шапялевіч. З цудоўным настроем накіраваліся ўсе выконваць заданні.

Але свята роднай мовы яшчэ не закончылася. Увесь тыдзень будзе прысвечаны беларускай мове, літаратуры і культуры. Старшакласнікі накіруюцца да вучняў пачатковых класаў з акцыяй “Збяры валізку”, прымуць удзел у конкурснай праграме “Спяваем па-беларуску” і конкурсе чытальнікаў. Таксама будзе магчымасць паглядзець мультфільмы, перакладзеныя на беларускую мову вучнямі нашай школы, і прачытаць любімыя вершы нашых настаўнікаў.

Дзень роднай зямлі для вучняў 5 – 7 класаў прайшоў насычана і займальна. Свая гульня “Сем цудаў Беларусі” запрасіла ўдзельнікаў здзейсніць завочнае падарожжа па роднай краіне. Тры намінацыі “Гарады Беларусі”, “Рэкі Беларусі” і “Незвычайныя помнікі Беларусі” далі магчымасць вучням не проста паказаць свае веды, праявіць кемлівасць, але і запомніць новыя незвычайныя факты пра Беларусь. Удзельнікам гульні прыйшлося ўспомніць, якая рака самая доўгая ў нашай краіне, якая працякае праз Мінск і Ждановічы, якая беларуская рака ўпадае ў Чорнае мора. Неабходна было назваць літары, на якія не пачынаюцца ў нашай краіне назвы гарадоў, таксама цікава было ўспомніць гістарычныя факты пра нашы беларускія гарады. Асаблівай цікавасцю карысталася намінацыя “Незвычайныя помнікі Беларусі”: хто ведае, у якім горадзе ўстаноўлены помнікі літары Ў, агурку, вішні, вераб’ю, пятаку, рэкам, настаўніцы, шахцёрам, поясу… А вучні 5 – 7 класаў ужо ведаюць адказы на ўсе гэтыя пытанні.

Другі этап гульні дапамог праявіць эрудыцыю: вучні складалі для турыстаў маршрутны ліст “Сем цудаў Беларусі”, спрачаліся, даказвалі, стараліся пераканаць, што той ці іншы аб’ект можна назваць цудам Беларусі.

На трэцім этапе гульні ўдзельнікам было прапанавана скласці каталог “Сем цудаў аграгарадка Ждановічы”. Атрымаўся даволі цікавы спіс: гарадзішча “Банцараўшчына”, музей-дача Васіля Быкава, санаторый “Крыніца”, храм Узнясення Гасподняга, платформа Здановіча (сучасны вакзал) і заснавальнік нашага населенага пункта І.У.Здановіч, мастак Мікалай Валынец і яго спадчына, заказнік “Лябяжы”. Былі прапановы ў гэты спіс занесці і першы цагляны будынак нашага аграгарадка, дзе сёння размешчана амбулаторыя, і санаторый “Беларусачка”, і прадпрыемства “Дарыда” і… Было прыемна ўсведамляць, што край наш багаты на славутасці.

Каманды “Вясёлка” і “Маланка” спрачаліся заўзята, перамогу атрымала зборная каманда “Вясёлка”, але настрой быў цудоўны ва ўсіх удзельнікаў гульні. А завяршылася мерапрыемства праглядам відэароліка “Ждановічы: мінулае і сучаснасць”, знятага вучнямі 8 “Б” класа (экскурсавод Вікторыя Дарожка).

Спрадвеку на Беларусі на працягу зімовых святак калядоўшчыкі з песнямі і віншаваннямі абыходзілі ўсе двары ў вёсцы. Гэты звычай падтрымалі і ў нашай школе. Пад кіраўніцтвам настаўнікаў беларускай мовы і літаратуры Алены Валяр’янаўны Крукоўскай і Вольгі Алегаўны Жук вучні 6 – 7 класаў зладзілі цудоўныя калядныя выступленні.

Падрыхтавацца да свята было няпроста: вывучалі гісторыю калядавання, шукалі і развучвалі калядныя песні, пісалі сцэнарый, падбіралі касцюмы.У кожнага была свая важная роля.

У класы завіталі Каза, Мядзведзь, Конь, цыганы і проста вясёлыя калядоўшчыкі.За сваё выступленне самадзейныя артысты атрымлівалі цукеркі. Разам  з гледачамі калядоўшчыкі танчылі, спявалі, загадвалі прысутным загадкі.Выступленні прайшлі весела і ярка, падарылі выдатны настрой як гледачам, так і самім артыстам.
Пакалядаваўшы ў школе, вучні накіраваліся да сваіх сяброў, знаёмых, радні. Прымалі калядоўнікаў радасна, шчодра адорвалі цукеркамі. У некаторых кватэрах нават спявалі разам з калядоўнікамі, танцавалі. і вельмі шчыра дзякавалі за святочны настрой.

ФОТА ГАЛЕРЭЯ

Мініяцюрныя Нясвіжскі палац і Брэсцкая крэпасць, Мірскі і Лідскі замкі, храмы – наша архітэктурная спадчына ў музеі мініяцюр “Краіна Міні”. Вучні 5-х класаў наведалі незвычайны музей, дзе адразу можна было ўбачыць самыя вядомыя архітэктурныя помнікі Беларусі. Уражваюць макеты, аформленыя па-сучаснаму, з падсветкай і іншымі тэхнічнымі вынаходніцтвамі. Асабліва зацікавіла пяцікласнікаў магчымасць здзейсніць віртуальнае падарожжа, “пахадзіць” вакол збудаванняў, паглядзець на іх з розных бакоў. Прыемным бонусам былі падарункі падчас майстар-класа і фотазона, аформленая ў выглядзе аўтэнтычнай беларускай хаты, запоўненай прадметамі народнага быту мінулых стагоддзяў. Знаёмства з Беларуссю прадоўжыцца, але ўжо падчас рэальнай экскурсіі. Вучні 5-х класаў ведаюць, куды адправяцца ў сваю чарговую вандроўку.

Інтэрактыўная экскурсія

Канікулы – гэта час, калі можна не толькі адпачываць, але і падарожнічаць па роднай Беларусі. Вучні 5-х і 6-х класаў так і зрабілі. Яны адправіліся ў горад Жодзіна. Экскурсія на прадпрыемства “БелАЗ” прынесла мноства эмоцый. Цікавую інфармацыю атрымалі вучні пра гісторыю ўзнікнення завода, убачылі макеты машын, якія выпускаюцца тут падчас кароткай экскурсіі. А таксама была магчымасць пераканацца, што беларуская прадукцыя карыстаецца вялікай папулярнасцю за межамі нашай краіны і экспартуецца больш як у 70 краін свету. Але асаблівыя эмоцыі выклікала магчымасць падняцца на машыну, якая памерам з трохпавярховы дом. Уражанні былі незабыўныя. Фотаздымкі атрымаліся найцудоўнейшыя.

Але фотасесія не закончылася на “БелАЗе”, бо жыхары горада Жодзіна вельмі незвычайна ўпрыгожылі свой горад. Менавіта тут знаходзяцца алея ліхтароў і алея лавачак. Хто б не зрабіў фотаздымак пад ліхтаром за швейнай машынкай? Кожнае прадпрыемства Жодзіна прымала ўдзел у конкурсе на лепшую лавачку або лепшы ліхтар.

Курган Славы таксама наведалі пяцікласнікі і шасцікласнікі на асенніх канікулах. Даведаліся, як узнік гэты помнік і што сімвалізуе. Вучні ўшанавалі памяць нашых продкаў, якія мужна змагаліся ў часы Вялікай Айчыннай вайны і вызвалялі Беларусь. На канікулах можна бавіць час і цікава, і карысна.

 ФОТА ГАЛЕРЭЯ

У Ждановіцкай сярэдняй школе адбылася прэзентацыя калектыўнага зборніка, створанага пісьменнікамі Міншчыны “Ад калыханкі да забаўлянкі”. Падрыхтавала і правяла мерапрыемства Кацярына Хадасевіч-Лісавая, якая прыйшла да дзяцей у вобразе Феі Краіны Сноў. Чараўніца запрасіла школьнікаў у віртуальнае падарожжа па Малой радзіме. Цягам вандроўкі дзеці пазнаёміліся з творамі літаратараў, якія жывуць на Міншчыне. Са сцэны ў выкананні лепшых школьных чытальнікаў гучалі вершы, вакальная група спявала песні, гледачы падчас інтэрактыўнай часткі разгадвалі загадкі, змешчаныя ў кнізе. Асаблівую атмасферу стварылі запрошаныя госці – выхаванцы Ратамскай дзіцячай школы мастацтваў. Юныя музыкі прадставілі свае лепшыя канцэртныя нумары.

Атрымалася не проста прэзентацыя цудоўнай кнігі для дзяцей, а сапраўднае літаратурна-музычнае свята.

Клуб юнага журналіста “ЛІМОН”

ДУА “Ждановіцкая СШ”

Вучні 8-х і 10 класаў 23 верасня здзейснілі цікавае падарожжа ў музей Васіля Быкава, які знаходзіцца ў Ждановічах на вуліцы Вінаграднай. Усяго шэсць пакояў, у якіх жыве цэлая эпоха. Нам пашчасціла пабачыць рукапісы і машынапісныя старонкі аповесці Васіля Быкава “Жураўліны крык”. Мы пабывалі ў гаражы і даведаліся, што пісьменнік сам рамантаваў сваю машыну. Завіталі ў пакой, дзе працаваў гаспадар дома, і даведаліся, што пісаць на дачы ён не любіў. Пабачылі таксама і малюнкі Васіля Быкава. Машынка, на якой друкаваліся лісты, кнігі, часопісы, фарбы… У двары прыветна пазірала на нас альтанка, абкружаная бярозамі, агрэстам, барбарысам.

Экскурсія была цікавая і карысная. А наперадзе тыдзень разважанняў і магчымасць выказаць свае эмоцыі ў выглядзе эсэ, замалёвак, апавяданняў. Вялікі дзякуй гаспадыні дачы і экскурсаводу за незабыўныя хвіліны ў доме Васіля Быкава!